學生L與媽媽參加表姐嘅BB女一歲生日會，未夠下午一點，就要告辭，問佢星期六放假趕去邊，拍拖乎？學生L話：「去教琴呀！」哦，學生L拉得一手小提琴，早已考獲演奏級，正好學以致用，教番一兩個小學生幫補吓私立大學嘅學費。學生L本想入中大讀護士，點知文憑試考最有把握嘅化學科影響總分數，慘遇滑鐵盧，只好入咗私立大學讀商科，但最近得到好消息，澳洲有大學收佢讀護士，農曆年後就南下墨爾本入學，左丁山此日得知後恭喜學生L之餘，又為佢擔心：「畢業後，返唔返得嚟做註冊護士㗎，咪又長留澳洲噃？」學生L話：「會返嚟香港嘅，要考試囉，不過及格率有五成以上，到時應該可以考到啩。唔似得外國醫科畢業生回港考試，及格率只得一成左右，或甚至更低。」
去澳洲讀專科，回香港服務，等於澳洲為香港培養人才，或者係香港向澳洲大學「買位」，對香港有着數，最令人困擾者，本港醫院嚴重缺乏醫生，偏偏香港又要卡住外地醫科畢業生，令佢地難以回港行醫，令市民蒙受極大損失，益晒醫學界，香港醫生嘅收入，實在高得驚人。
上星期日在馬場睇董事盃一級賽，意大利騎師杜滿萊騎「將男」奪標，委實技驚四座，呢隻馬在本地騎師蔡明紹手上，已經難以贏大賽，評馬人認為「將男」嘅分已經飽和，幾難再有突破，點知原來換上一個國際級騎師，竟可勝出一級賽。肥仔K查吓杜滿萊嘅背景，原來佢在日本客串已有幾年，贏過不少一級大賽，曾贏過「天皇賞」，得以參見日本天皇，威震日本馬圈。於是佢想在日本長期發展，但日本要佢考「騎師牌」，咁一流嘅騎師，仲要考牌？係要考噃，仲要考埋日文㖭！結果杜滿萊就係肥咗日文，騎師考牌試落第，於是益咗香港，佢轉來香港客串，表現令馬迷拍爛手掌。日本騎師嘅水準其實好一般，無世界級水平，但透過考牌試，將外國名師拒諸門外，此乃保護主義作怪。杜滿萊考唔到日本騎師牌，大約等於劍橋醫學院講座教授考唔到香港醫生執照，同樣係荒謬事情，香港病人難道只能逆來順受，不能碰一碰醫學界利益？
保護主義與利益如何平衡才好?
大家認為nursing council對於保護護士這行的利益做得足夠嗎?
心中明白. 不用明言.
沒有留言:
發佈留言